曾智華 精彩人生自己創
「浪漫勇士」幾經辛苦（從未見佢要用咁多力），終於在麥道朗犯規下，Bump開莫雷拉的「大怪奇」，然後出盡飲奶力鬥贏死纏的「數字天文」，僅以半馬位勝出「遮打盃」。
跑完今次，「浪漫勇士」這隻8歲馬，應已少少傷及元氣，必須唞一大輪才可再戰嘞。
但無論如何，這匹全球最高獎金賽駒，今年已經成為三冠王，呢呢，咁就有點「煩」嘞，煩乜？正是今季香港馬王寶座，應該邊隻坐呢？
「嘉應高昇」全球無敵手，有幾多潛藏仍然深不可測，次次出，次次贏，破盡一切紀錄，佢做馬王，百分百實至名歸，全世界冇人有異議，因實在是太太太犀利了。
「嘉應高昇」唯一缺點，為獨沽一味跑短途。眾所周知，競賽馬，跑短易過跑長好多，因氣量唔同，更何況「浪漫勇士」千六米、二千米，再到二千四百米都掃晒，難度絕高，加上已成全球獎金最高賽駒，唔畀佢做馬王，似乎點都講唔過去，老友，咁點搞好呢？
小弟忽發奇想，既然跑馬有平頭Dead Heat，咁，爭馬王也可否有平頭呢？若如此，一定皆大歡喜，冇人挑戰勝出者，這方面，馬會高層可否諗諗佢。
近日賽馬，另一高潮為大家猛估潘頓幾時衝破二千W，然後，又有幾隆重儀式嘉許？
潘頓的二千W慶祝儀式，絕對是「預製食物」——整定也，問題在幾時擺上枱。
我會用陰謀論睇，你以為佢越快掂，佢就越冇咁快掂。上周日「軟硬鞭」贏完三場，立即收工，「唔去住」極度明顯。如此，今晚會否贏多兩W上岸？我買唔會，應一W即收工，再留返去沙田大鑼大鼓黃袍加身。今晚一W係邊隻？買「管之友」，8歲冇保留，退役前在強項最後一擊！