黃秉華
「雪亮工程」係乜傢伙？可以嚇到外國在華記者「背脊發涼」咁交關。
「好耐啦，你講嚟做乜？」大哥，你係IT人，不，更正，你係AI人，喺馬料水科學園返工，梗係見多識廣啦。我仲係初為科技記者時，即二十、三十年前，只知道人臉識別技術最出位係以色列，皆因佢仇家多，從日本赤軍襲機場，到慕尼黑脅持人質事件，以及多宗劫機事件教訓之下，以色列發憤圖強，深入研究高科技防範偷襲事件。「中國也有恐襲教訓，所以亦基於安全理由加強有關技術囉。」點知，中國發展神速，香港人話齋︰多咗。如是者，引起落後國家及地區人士的反彈。
有外國媒體最近提到，中國一直監控外國人尤其是記者，反映中國不是一個友善的安全國家咁話。「原來如此，監控呢家嘢在科技界視為家常便飯，兼且係一盤生意，補充︰美國AI監控同智能追蹤，全世界認第一，暫時無人企出嚟認第二，你睇2月28日在海灣戰爭，伊朗有幾悲壯的打擊，就知道美國有幾犀利。」咁又係，你不愧為香港AI專家。
科普一下︰「雪亮工程」發展約十年，內地以縣、鄉、村三級平台為指揮中心，以治安信息管理為基礎，以供公共做好「群眾性治安防控工程」。係呢，有咩落後國家之人大驚小怪？我話︰「有點尷尬，這是率先提出工業4.0智能化革命的歐洲某國。」
哦，唔怪之得啦，人家不是落後，而係「人為貴，私隱更重要」，拜託！