曾智華
一年出外食二百幾頓晚飯，我當然掌握各食肆的成敗因素。裝修、服務、出品當然重要，但似乎很多食肆負責人，完全唔了解一個設施理想又衛生的洗手間，較上述三方面更重要。
香港某名店不時問我幾時再去，問得多，終坦白相告：「你哋個洗手間好唔掂。第一，有濃烈臭味；第二，尿兜之間無間隔，欠私隱，加加埋埋，會趕走好多客。」
其實尿兜之間安裝間隔，兩三百元已掂，為乜唔做呢？香港人口老化，阿叔阿伯個個有前列腺問題，「殊殊」時間越來越耐，若再冇私隱，肯定去得好唔安樂。呢種心理故障，冇乜人會公開講，或私下與食肆負責人表白，只用「腳」去表示意願。有時都幾替部分菜式出色酒家唔抵，因「死」在個洗手間，絕對唔值得。
眾所周知，公共屋邨商場未變領展商場前，洗手間十之七八非常惡頂，無他，當年由房屋署管，公職人員做又三十六，唔做又三十六，點會著緊吖。轉咗領展商場後，需要講商業競爭，好得多了，但有個別仍不算理想。
早年領展有一營運策略，為賣出部分又舊又唔就腳的商場，套現資金再投資。不少這種商場落在只顧收租、唔再投資改善環境者手，效果非常不理想，當然也無法增加人流，只烏吓烏吓咁繼續。
但有一個例外，認真重錘，正是天馬苑商場的業主。唔入過唔知，此商場公廁，我敢講應是全香港最佳公共洗手間。
點解？又大又乾淨，入到去（女廁唔知㗎），寬敞舒適，尤其尿兜與尿兜之間，空間特闊，也有高高的間隔，任何前列腺有問題的長者，也可去得舒舒服服。
單單呢個洗手間，已足令小弟誠意推薦，也會多多幫襯，順便行商場。