曾智華
一個國際公認的頂尖騎師、曾經是香港的四屆冠軍騎師、曾經一日輕易掃多場頭馬的騎師、曾經被稱為「神」的騎師、贏盡香港級制大賽的騎師⋯⋯如今只是42歲，豈會突然一切急速走下坡的？究竟發生乜事？小弟唯有用撞邪去解釋。
大家當然知我講邊個，正是莫雷拉。相信近日方嘉柏、方廄馬主（人人要夾錢請拉叔㗎），以至方廄上下員工（贏馬可以有獎金分），皆冇癮到暈。馬迷又如何？「拉縮」出賽馬，不少隔夜已大熱，意即公眾投注倒水咁倒，因冇人會相信佢成績可以差成咁。由4月22日開始，直落五次賽馬，大把馬騎，只得兩W，完全不符合正常期望。
近三次更大大鑊，跑二十五場，竟然隻隻有飛，隻隻瓜得，零W，只得一亞一季。老友，你話嘞，唔係撞邪，點可能衰成咁？
任何事皆有其因，有冇邊個高人可以查找又或分析到，莫雷拉為乜會變晒質？
方仔搵佢來前，打晒開口牌話明刀明槍爭冠軍，故此，所有馬匹皆畀晒佢騎。本來成績唔差的徒弟仔黃智弘，只可靠邊站，得個睇字，但點服？明明你「拉縮」來之前，我成日有馬贏，但部分馬去到你手，立即瓜得，可恨師傅又唔畀我試，怎不谷到變田雞？
馬圈乃一個金錢圈，非常現實，如今個個方廄馬主輸到褲穿窿，當然初則啞忍，繼而發出怨言，再落去，必逼方仔「斬帥」，唯有如此，才見新希望。
事實，方嘉柏由莫雷拉未來時的榜首位置，如今撻到第三位，若再交不出頭馬，冠軍就係咁先嘞，肯定，若今晚再食白果，必定有更多人「佛都有火」，唔起義就奇。今晚方仔再出「有情有義」，似有表示，再唔掂，就「無情無義」㗎喇。