曾智華
點解要將「焦點」拉埋同莫雷拉講？因兩者反差太大了。
一隻是五班老馬，搏極都仲有，一季竟可三W，鬥心驚人，尤其剛剛咁辛苦𡁻完一場，立即再跑，改策略，唔後上，放頭，哈，又贏！馬主雷聲傳開心到爆，其實佢賽前已就小弟專欄標題《向「焦點」練者致敬》來訊感謝支持。
小弟本周三唔敢再睇好此老馬能W，故只買十蚊雞作小小心意。哈，竟又再跑第一，派89.5元，賽後立即走落土瓜灣，買碗及第粥消夜，開心死。
同一晚我貼莫雷拉的「平凡騎士」，佢並非不落力，而係隻馬「冇」，打極唔去。
今次拉叔捲土重來，之前是萬眾期待，之後⋯⋯唉，噓聲四起，成績遠比估計差。當然，除佢本人外，坐騎亦有問題，單單周三，出六隻，全部四甲不入，捧場客焦頭爛額。
莫雷拉及潘頓有同一現象，是坐騎全部偏熱，尤其今次拉叔再到港，練馬師方嘉柏摩拳擦掌，明刀明槍揚言爭冠軍，馬迷當然投信心一票。結果佢騎牛都熱，唔知輸死幾多人。
呢個世界，正常現象，愛之越深，若你交唔出期貨，就會恨之越切。
馬季仍有兩個月，且看莫雷拉走之前會否變返雷神，定繼續扮演「拉縮」了。
明日沙田之戰，專注研究第六場三班千二米。有隻馬個名好搞嘢，名「有備而戰」，但兩出兩輸到甩轆，擺明其實「冇備而戰」，真係笑甩牙。
呢場有幾隻未上過陣的不明物體，唔睇住。
選三隻互串，布文的「星月飛雲」，今季此程三度接近，韋達季尾回勇，要揀。另外，「健康快車」今季也四次同程跑二三四 ，應快「到站」。最後要埋「傑出雷霆」，又係三次跑千二米，皆二三四，今場頭馬應該此三匹之中。