曾智華
今期大電影，基本畀三套霸晒，即《穿PRADA的惡魔2》、《米高積遜》及《寒戰1994》。三套睇勻後，再冇選擇了，唯有縮在家中，搜搜Netflix有乜好戲。
咦，發覺No.1收視名《圈套》（《Trap》），兇殺懸疑片，即管開來瞄瞄，畀十五分鐘「容忍時段」，好就繼續，唔好就Next。
結果一睇就被吸住。此片並非A級片，但故事發展及連場歌舞，有極強磁力。電影靈魂為編劇、導演集一身的奈．沙馬蘭。不止，片中令人眼前一亮，歌舞達國際一流水準的主角莎萊克．沙馬蘭，是其女兒，飾演巨星Lady Raven。論唱功，論舞藝，直追Lady Gaga，但更年輕漂亮，顏值絕高。
電影一開始就吸住觀眾，因見慈父庫柏，帶著12歲女兒萊莉到大體育館，觀看偶像Lady Raven的演出，全場三萬席位爆滿。
引起觀眾最大好奇的，為進場時，所有出入口皆布滿重裝特警，人人面容繃緊，手執長槍，高度戒備，完全不似是一場正常的演唱會。庫柏當然察覺到氣氛有異，但基於女兒是狂迷，唯有緊緊相伴。
劇情發展下去，原來警方正在作出天羅地網布防，因收到可靠線報，一名兇狠的連環殺手，會在會場內出現。
警方計過數，觀眾絕大部分為女孩子，而成年男人數量有限，故只需堅守所有出入口，凡成年男子就審查，必定會拉到「屠夫」。
電影就在台上連場精彩歌舞，與會場內千計警察追兇中穿插剪接，異常緊湊。
記憶所及，此片似乎從未在香港公演，今番能上架Netflix，觀眾之福，因會令你屁股不離座一百分鐘，快啲睇啦。