曾智華
人有好多種，成堆爛泥款，見佢行近，立即調頭走，應酬都費事，嘥時間。馬都一樣，十跑十輸又冇鬥志，刨都費事，見到個名立即飛得。
但有啲人、有啲馬唔得，可能唔關人或馬本身事，只因與上司或練馬師時辰八字唔夾，若轉一轉，有可能跑出彩虹。
例如7歲老馬「焦點」，初來香港，放在呂健威馬房，評六十五分起步，外地賽績相當好，出六場，兩W一Q兩P，到港前贏的，是澳洲昆士蘭一班讓磅賽，質素冇可能差的，但就係咁奇，在呂廄出八次輸八次，由千二米跑到千六米都唔掂，相信練馬師都投降，馬主雷聲傳也心淡，點呢？轉馬房囉。並非轉去更勁的練馬師，而是交畀次一級的鄭俊偉，表現更差，次次一睇賠率，即知唔使買，在鄭廄最後兩場，更配「收工」騎師、毫無鬥志的陳嘉熙，表明三個字——無機會。
仿似一個打工仔，質素未明，但長期跟著平庸上司，點可能突然大爆發呢？
老友，由六十五分撻到落二十七分，仲有邊個馬房肯收？幸而香港每季都有新人開倉，都要馬，好好醜醜都殺，終於落在新來的游達榮手。
一隻從來不知競賽為何物的馬，就此脫胎換骨，先跑一場第四，再出，即W。上季一W兩Q一P，邊個話「焦點」係垃圾？
游達榮化腐朽為神奇。今季神奇故事繼續，竟再取兩W一P，凡W皆後上如飛，意即騎練都摸到此駒致勝之道。
今晚又出，雖然機會大減，但仍值得用十蚊，向此馬及游達榮，也向奮鬥精神致敬。
講講尾場，十一隻馬，過半有機會，我取莫雷拉「平凡騎士」，季初一擊即中後，不再跑1650米，點解？你話呢？如今又突然跑返，唔似在遊馬河喎。