踏入季尾，全港馬迷將焦點放在練馬師冠軍之爭，正路。事實，近年極少似今季，數落有六位練馬師已經加入戰圈，個個都有機會。邊個笑到最後，要看各倉主手上有幾多未用或未用盡的子彈。
例如蔡約翰，叫得做蔡神仙，可知幾厲害，十三屆香港冠軍榮譽絕對堅料，頭馬紀錄一千六百多場，論整體成績比拼，所有練馬師皆食塵。今季佢W咗四十三場，但馬迷個個知，神仙倉內的潛藏，深不可測，只要「撳掣」，即可能似火箭升空，問題在佢個人的抉擇。
發展至今，練馬師分三組：一、爭冠軍組（頭六位）；二、留返下屆再「玩」組（最明顯為伍鵬志）；三、拼死要畢業組（葉楚航、鄭俊偉及丁冠豪）。
其實睇第三組各練馬師的部署，也非常有吸引性，因為「粒粒皆辛苦」，出擊要精準，絕不可浪費子彈。
如今包尾大幡為丁冠豪，最為危險，旗下只得四十二匹馬，未出賽新馬六匹，不知是龍是蛇，要亮相才能鑑定，冇把握。
今日講丁冠豪，因直覺認為佢今晚會「去」，邊隻？正是「怪獸叉燒」。
呢件「叉燒」上周日上陣，獨贏賠率冷到四十倍，當然遊馬河，巫顯東沿途冇乜大力推騎，入直路肯定瓜得才推幾下，之前手軟軟。隔三日立即再跑，為乜？應該是上場作為今場的熱身。
究竟千八泥地啱唔啱佢？啱！今季跑過三次，一入Q一P一第六，入Q那次是四十九分，如今三十七分，仲唔起筷？博拉乎？
用巫顯東也唔好睇死，今季東仔跑長途，有辦畀你睇。剛剛「皇太后紀念盃」跑二千四百米，若非孭一百三十五磅，一定入Q，而非「君子傳承」。
好，今晚開定紅酒送「怪獸叉燒」先。