曾智華
做生意的人，有千百種心態，最後真正成功的只有一種——顧客不停回頭，變熟客。
點樣可以令顧客不停回頭？第二行我唔知，講飲講食，小弟最清楚。以下全部有致命的重要性：
一、裝修及氣氛，是否令人感到舒服（毋須豪華）；二、服務是否專業友善（黑口黑面態度惡劣，當然趕客）；三、價錢是否合理（毋須平，更不需強調抵食，合理已可，客人個個心裏有數）；四、洗手間是否清潔衛生，設計是否尊重客人私隱？（全球新的男性洗手間，已開始加小便尿兜隔板，令客人殊殊得舒服。這個，無人會公開要求，但明白顧客心態的老闆，必多好多男客生意）；五、食物材料要好，新鮮而質素高，當然，廚功更要勁。
做齊以上五樣，加上位置適中交通便利，若果你唔成功，就扑我個頭！
遺憾的是，大部分香港食肆掌舵者，皆做不到以上五項，故此冇回頭客。究竟死在邊樣，敬請自己查找不足！扮大喊十委過於人，完全冇用！
上周去咗一間久未幫襯的前名店，前名店，即曾經叱咤一時，但如今只得疏落顧客。
此店論地方，唔差；論服務，合乎水準；其實五項之中，有四樣七十分以上，結果死在一樣——唔得的食材照擺上枱。
此店並非屋邨酒樓，消費平均要七百元左右一位，事實，大廚廚功也不錯。
問題發生在⋯…一席菜，客人通常要求最高的是海鮮。你可以不是游水，但絕對絕對不可是死咗好耐，連肉質都變散的，仍畀客人食！
鯉魚門好多呢類死魚，多會起肉醃到入晒味，上粉再炸，然後用酸甜汁跟上。
我哋食的，是大斑兩味，炒球及炸頭腩。大佬，死咗咁耐，仲點炒球呀⋯…唉。