蘋果領導層交棒，市場期望新任行政總裁特納斯（John Ternus）可帶領蘋果追上人工智能（AI）時代，扭轉落後頹勢。AI席捲各行各業，講究人脈同人與人溝通嘅公關傳訊行業又有冇趕上AI大潮？
香港公共關係專業人員協會（PRPA）上月慶祝成立三十周年，同時發布一項同恒生大學傳播學院合作進行嘅公關行業調查，其中部分針對AI，七成六前線公關從業員，以及八成一管理層，對AI喺工作上應用表示樂觀。
至於AI係咪能夠取代部分公關工種，調查發現五成管理層預計未來兩至三年內，公關日常工作會有兩成六至五成被AI取代，前線公關就只有三成六持同樣睇法，反映管理層對AI變革速度和規模嘅預期，比較前線人員更為進取。不過雙方都認同，AI主要影響範疇係內容寫作、資料搜集，以及研究等基礎任務，而涉及溝通、關係建立和協調等需要人性化判斷和人際互動嘅工作，業界認為AI無法取替。
由創意主導嘅市場推廣、品牌形象、創作、製作等工作，亦都日漸廣泛應用AI。金管局上月推出防騙《決戰嗱喳蕉》MV，就係由AI生成，而幕後創意班底係Adbrownies Group。早排同公司創辦人兼創意總監王嘉明（Karin）傾偈，佢認為創意行業應用AI係大勢所趨，但講到底AI只係其中一項工具，或者可視為同創意團隊一齊「傾偈」撞橋嘅拍檔，原創意念仍然嚟自人腦。
好多人覺得用AI係撳個掣好快出到作品，Karin認為yes and no，因為整個過程由同客戶溝通、敲定策略和主要訊息、度橋、設計、製作、調整細節等，所需步驟和時間都唔會壓縮好多，但撞橋過程中可以將一啲未成熟嘅概念放入模型試驗，早期創作時間確實會快咗，但亦非秒速可完成和定稿。
另外要注意AI模型大多係yes man，一般會就住使用者嘅諗法生成，好少ban橋，相反同人度橋反而會撞出意想不到嘅靈感。一個比較好嘅方法係將AI當成團隊成員，促使人同AI協作，另外可以用唔同模型，指令佢哋互相ban橋。AI另一弱項係做決定，大模型好容易生成幾百個作品，但佢唔擅長眾裏選擇最適合嘅橋，而創作過程中最困難部分正正係做決定。Karin講笑話，成個製片工序中最難畀AI取代嘅可能係剪接師，因為呢項工作就係要不停做決定。
講到取代，AI又能否取代創意團隊？Karin公司呢兩三年不斷引進AI，但並未因此而削減任何一個職位，佢覺得即使過多幾年AI亦未必可以取代創意團隊，但可以預見，識得同AI協作嘅創作人就有可能取代唔識嘅人。當然，識用唔代表用得好，今日用得好亦唔代表技能聽日仲夠用，所以喺AI世代，我哋唔係靠本身知識和技能嚟競爭，而係靠保持好奇心，不斷學習，不斷挑戰固有思維。
