(曾智華)
喂喂老友，真係大大隻肥嘟嘟老鼠呀！
小弟慣性每朝到紅磡高山道公園晨運，近日天氣越來越暖，除植物欣欣向榮春暖花開外，真的是萬物生機勃勃。首先最大鑊又煩透，為蚊滋空群出現，你著短袖短褲，必定被靜靜抽血，抽時不痛不癢，但十分鐘後就知味道。
另外，蛇蟲鼠蟻也全部蠢蠢欲動。
前天早上，嘩嘩，有冇搞錯，正正見到三隻大老鼠，由A草叢散步到B草叢，非常健碩又精壯，肯定日日營養充足。
冇食物的地方，一定不會有老鼠，如今隻隻圓碌碌，當然晚晚飽餐啦。小弟唔敢肯定，只能指出，高山劇場有兩個食物庫，一為舊翼康姨小廚內的大廚房，另一為新翼邊的新翼餐廳，極有可能正是眾多老鼠覓食之處。
話畀老友聽，佢反應：「喂喂，快啲打去衛生署蟲鼠組或高山道公園辦事處投訴啦。」
我笑笑：「老友，你睇睇近期宏福苑大火公開研訊，已知政府部門幾咁『各家自掃門前雪』啦，以及『交波技巧』幾高㗎啦。你從正途投訴，可能個File由A部門掟去B部門，再由甲組掟去乙組，成身汗之後，都未知個波由邊個接！」
「咁點呀？唔理算數？」老友問。
「當然唔會，我做咗幾十年公務員及傳媒工作，當然知道投訴點搞最有效。香港人都知，有問題最快搞掂報《東張》，不過，佢哋積埋幾千宗要求，點得閒做吖，等我自己嚟啦。做官最怕自己部門出事，公開畀人柴台，冇晒面，又驚畀上司睇到照肺，故必責承公關部日日剪報，睇睇有乜唔妥嘢曝光。」
嗱嗱，今日小弟就公開投訴——高山道公園鼠輩橫行，睇睇幾時有人接波先。
有關方面若果唔知邊度有老鼠竇，搵我啦，帶埋你去睇都得㗎。