中學時，讀到《論語．季氏》，深入腦海，內文為「聞有國有家者，不患寡而患不均，不患貧而患不安」。
老師解釋曰：「凡執政者，必須令社會和諧穩定，故此，應透過合理的社會制度，公平地分配資源。無論社會資源如何不足（寡），也不能分配懸殊（不均），否則，動亂必由此而生。」
今日突然想起中文課的一幕，因見到英國國會兩院審議通過《煙草與電子煙法案》，決定禁止17歲及以下國民（即2008年後出生者），終身不得購買香煙，目標是要打造無煙世代。
一個社會，資源分配與公權分配，同一道理，要有，就人人有；要冇，就人人冇。若搞到一啲人有、一啲人冇，即人為製造特權，你叫冇權者點順？高壓專制社會，可以用強權壓下，唔順搞事就拉你坐監。
英國乃一個開放型民主社會，個個政客都要靠選票才入到議會，如今搞出一條剝削17歲以下國民權利法案，等於埋下一個動亂炸彈。一方面將出現連場示威抗議，另方面，深感不公者，當有選票時，必會踢製造不公的議員出議會。這個，毋須高深政治分析，情況勢必如此發展。
四年前新西蘭政府也是玩「權利不均」，同樣禁止年輕人一世不可買香煙。結果？當然無法維持，不到一年，新政府換屆即廢法例。
其實任何一個政府推禁煙，都存在一定的「偽善」，一方面知道這個稅收是天文數字，兼且不少國民上晒癮，難以戒除，另方面，又知吸煙帶來全民健康問題，將醫療系統壓垮。
理性政府，應該以教育、經濟及行政手段，慢慢將吸煙習慣淡出，絕不應似英國如今般，搞權利分化，製造矛盾。
小弟睇，呢條法例，肯定玩唔長。