始自上世紀八十年代中，日本精密科技位列全球冠軍，日本機械人開始走出台前，成為日本名片。2000年ASIMO機械人識行識走，差在仲未識翻觔斗啫，但唔緊要啦，世上哪個工業大國追得上來？
去年北京舉行機械人半馬比賽，與人類同場較量，結果甩頭甩骨，作為過去日本科技的Fans，我都唔好意思提起，後來見到國產機械人打功夫又翻觔斗，以為「真係」好勁，點知上網好多留言，話國產機械人是預先編程的，即係唔會臨場「執生」嘅，美國先有如此「精靈」的真正智能機械人喎。我讀得書少，你唔好呃我噃。殊不知，真係被人呃得透。
士別一年，北京機械人半馬再度舉行，結果機械人以50分26秒奪冠，比上屆快近2小時，遠超人類男子半馬！吓，唔係馬斯克間廠生產嘅機械人「必屬佳品」嗎？再上網Check一下，日本ASIMO已經在新冠期間停產，即係話中國人暫時未能跑得過外國人，但機械人就遙遙領先。
我其實想說的是，今屆機械人半馬有自主航道模式參賽的，由機械人自行規劃路線、避開障礙，技術要求之高，國產又是遙遙領先。
旁邊朋友提醒我︰「你仲得閒理埋中國強，定係美國、日本先至強？快啲抄低今屆參賽機械人半馬的公司名啦，睇吓上咗市未，定有計劃上市囉。」係，咁先至有益有建設性。
話時話，日本自衛隊經過一百三十一年，還在惦記佢阿公那些年有幾威，唉，今時今日是無人機、機械人上場，你準備好未呀？