(曾智華)
曾幾何時，打機與煲劇，被不少家長視為「邪魔」嗜好，令人不務正業，荒廢時光，兼且一旦上癮，會似魂不附體，身不由己日日打、日日煲。
故此，我的上一輩及同輩，對這兩項「邪惡習慣」，非常排斥也憎惡。試過有同輩老友（其實這種例子我見唔少），正因兒子日夜沉迷打機而反大面，趁兒子出街，粗暴將整部遊戲機摧毁，掉到垃圾站。
後果點？你話呢？
簡單，就似拆散一對深愛對方的情侶，你叫兒子點服氣？點接受？於是父子由那刻開始冇偈傾，雖則兒子仍要靠父母供養，被逼忍氣吞聲，一到能自立，當然立即離家出走，從此父子關係一刀兩斷。
小弟看在眼裏，唔方便講，更不會多多事給意見（事實人哋又冇問），只覺無限惋惜。
如今，父親70幾歲，兒子也40幾了，幾年前結婚，根本唔通知父親，只得母親仍間中聯絡，母親夾在中間，非常痛苦。
講返我個人經驗又如何，因從來「天生愛自由」，自己愛，當然也應尊重別人的自由，包括仔女。女兒「肥女B」與兒子「排骨仔」，一如其他同期年輕人，極之喜歡打機與煲劇，我點處理？只由細到大灌輸，自己自由選擇下的結果必須自己「享受」，好的與唔好的皆要啃，咪怨。其實佢哋中學已到外國讀書，我也管無可管，年輕人，有年輕人的價值觀，咪亂過問！
結果？早年與「排骨仔」去日本旅行，吓吓，先發現佢識日文！問邊度學：「肥爸，打機學囉！」
上周與「肥女B」遊韓國首爾，又係吓吓，乜佢原來識講韓文，又問：「阿女，邊度學㗎？」同樣答案：「煲韓劇。」
佢兩個從來冇撞邪，反之撞出及掌握多一種語言。