(曾智華)
你可有發覺，有的舊朋友、舊同業、舊同學、遠年親戚，冇見一段日子後，再見時，會出現明顯變化呢？變差的無謂講嘞，就個人所見，變好的，在在不少。
點解變好？因修養轉變、學識轉變、際遇轉變、思想轉變⋯⋯另外，是懂得扮靚靚。
大家銀幕上見到的演員，無論幾優雅、衣著幾前衛有品味，其實卸妝後，全似街邊一個普通市民。
點解可以在戲中如此出眾？服裝指導囉。你記得電影《梅艷芳》嗎？片中清楚指出，若沒有劉培基，梅艷芳單靠自己的方法穿衣，絕難擺脫「娘」味。
今日，唔講人，講街邊的優質蛻變，正是住處附近的土瓜灣美善同道。
N年前，此處布滿車房及出租的士舖頭，滿地油污，不少車亂泊，只有在抄牌時才雞飛狗走。咁款，區外一般人絕對冇興趣行入去。
但過去五年，唔聲唔聲起咗變化，因附近一幢又一幢的中產屋苑落成，例如半山壹號、皓畋、ONE HOMANTIN及不少單幢優質大廈，成千上萬中產客湧入，這就令美善同道靜靜地起變化。首先見到Coffee Shop、文青餐廳及日式串燒店出現，可是數目太少，成不了氣候，有些頂了一年左右投降。
幸而隨著日子過去，優質變化開始萌芽了，有寵物扮靚店、女性美容店及高質素食物店進駐，生意不俗企得住。
最近凡周末，附近養寵物的年輕男女，也會拖狗仔到此一遊，漸漸出現群眾效應（Cluster Effect），咖啡店也慢慢旺起來，黃昏及周末充滿人氣。
未來，整條美善同道的公務員樓皆會拆卸改建，幾年後這個小區必煥然一新，大家有空，不妨留意這種神奇又慢慢優化的演變。