先作利益申報，小弟乃領展「大股東」，由上市第一日已經開始買，然後一直年年月月買，直至五十五元停止，至今持有的平均價為二十八元，另因派息多年，已全面歸本賺突，今後非大必要，不會出貨，一於由佢代我做收租公，免煩，現今息率近七釐，邊度搵？
基於是「大股東」，我當然不時巡商場，睇睇租賃情況及服務質素，發現略有參差。龍頭的，例如樂富廣場，當然較好，但二、三線屋邨的，仍是「同志仍須努力」及「大有改善空間」。
基於不時巡場，當然會泊車，消費後享受免費優惠，這種政策幾乎全港大商場皆有，也是作為吸引優質私家車客的競爭手段。
本來長期如此，但是忽然從4月8日開始，在毫無預告、毫無心理準備下，領展突然實施新泊車「撳水魚」政策，免費泊車後，附加每小時「打劫」五蚊，咁搞，即並非免費啦。
無法明白領展管理層的盤算，究竟是否想趕客，自削競爭能力？
就以小弟經常幫襯的樂富廣場為例，附近各大商場，包括又一城、Mikiki、AIRSIDE、荷里活廣場、MOKO新世紀廣場⋯⋯全部消費二百元起，已有兩至四小時免費泊車。
論設備、論舒適、論服務，冇一個商場比樂富廣場差，如今領展咁搞法，簡直是自閹。老友們議論也是，就算畀得起，條氣都唔順，點解明明人人免費，而你要每小時斬我五蚊？
早前我曾在本報財經版讚領展，在前總裁王國龍離職後，開始叻仔返，單單一項新加坡物業出貨，已經大賺，稍後應會加息。
點知呢頭讚佢叻仔，轉頭就畀佢個戇居居新泊車政策激到彈起。
請領展管理層，公開向全港大小股東解釋為乜趕客？