曾智華
殺到喇！講乜？正是周日舉行的《第44屆香港電影金像獎》頒獎典禮！
今屆開始提名時，已經多多爭議，因有理應入圍的幾部電影及幾位演員，在「不可抗力」原因下失蹤，台下當然噓聲四起，但又無奈，希望呢個現象屬過渡性啦，否則，金像獎權威性必被陰乾，到時就搞都無謂嘞。
好，等小弟以貼馬心情，估估今屆得獎名單，睇睇中幾多項。以下為個人選擇：
一、最佳電影：入選名單相當騎呢，連《風林火山》也在內，真真「唔係化」，呢套可以列入候選？憑乜？老友，我估獲選為《再見UFO》，因有香港情懷，也有訊息，並非柴娃娃商業片咁簡單。
二、最佳導演：我希望（即未必中！）係舒淇，第一次執導經已令人眼前一亮，當然可能因有大師級人馬，在背後幫忙及發功啦。
三、最佳男主角：《金童》張繼聰。單單欣賞阿聰拍此片時的堅毅表現，兼自資埋尾，絕對值得表揚，其他對手，普普通通矣。
四、最佳女主角：《醬園弄．懸案》章子怡。一個演員的演技，就是武功，行家一出手，極之容易分高低，這方面章子怡擺明高一班。
五、最佳男配角：《水餃皇后》的袁富華，演技彈離，片中的「糖水伯」畀佢演繹到入形入格，贏得。
六、最佳女配角：《再見UFO》的衛詩雅。呢套電影拍竣七年才面世，意即片中的衛詩雅屬八年前的水平。大家對佢在《破．地獄》的印象，早早蓋過一切，但假若你曾觀看《再見UFO》，必對詩雅演技有耳目再新感覺，片中佢演繹一個單純無奈的風塵女子，感謝形象設計，搞到佢外形百分百神似，然後，就到演技出場嘞，冇理由唔當選喇啩？