曾智華
上周五約咗港鐵前主席大M，到上環食Good Food，六點在港鐵油麻地站跳上往中環列車。
晚餐時間約六點四十五分，心諗六點半應該到啦吓嘛，中環站轉車，坐多一個站即到。上車後，大安旨意睇手機，查訊息，覆完一個又一個。
時為下班時間，因此逼爆車廂，揚聲器宣布乜都聽得唔清唔楚，我只靠間中透過車窗外望大概去到邊，但車廂逼到似「沙甸魚」（年輕讀者知點解？），一直係咁逼逼逼。
列車向中環進發，一站又一站，坐吓坐吓，睇睇錶，有冇搞錯，乜半小時仍未見全體要下車，即係未到中環站啦。
越坐越唔對路，終於決定速速跳下車。吓？我係咪入咗鬼域，明明半小時前上車，列車不停開行，點解仍然係油麻地站？
速速再跳上下一班列車，又再去中環，終於今次到中環人人下車，我順利轉車了。結果晚飯遲大到半小時，大M喝令：「自『隊』三杯道歉！」
「隊」？冇問題。我只將經歷問M哥：「喂喂，你做咗咁多年主席，推斷我剛才發生乜事呢？」
佢諗呀諗：「碌Sir，唔明喎！」當然唔明啦，佢長期有司機接載，冇港鐵客人第一手感受啦。
我又如何？終於在中環站下車後，拆解到原因喇。每晚五點半至七點，往金鐘站者皆知轉車人潮相當洶湧，簡直恐怖。你要轉車到柴灣，可能等天咁耐都未排到上車。咁點？人乃聰明動物，九龍過香港者，既然金鐘轉車往柴灣極其困難，於是精明者多唔喺金鐘落車轉車，改搭多一個站，直到中環才轉乘港島線。
我去到中環站時，正處高峰期，落車人潮與上車人潮同樣多，令我一時唔覺已到中環站，繼續睇手機，於是就中招過晒廟，變咗返回九龍嘞。