(曾智華)
香港經濟非常趣怪，一方面股市暢旺，私樓也觸底上調，失業率冇大幅飆升，做飲食業的老友繼續話畀員工激到紮紮跳，不時炒老闆魷魚。
老友，你咪以為通街吉鋪等於乜都惡當，其實食肆數目並冇大減，執笠嘅多為樓面又大又舊、早早無心戀戰的酒樓。
新開的食肆，不少為大集團旗下，改個名字繼續做。例如美心集團「改名新店」正是開完又開。
咁飲食業生意又是否很好做呢？唔係，一方面要應付北上消費大潮，另一方面，樣樣成本畀個「衰人」狂特（近日碰口碰面都咒佢祖宗十八代）無情情打人，搞到經濟大亂，乜都貴晒，全人類攬住大出血（可能只有佢親戚、老友預知消息發晒達，專賺陰公錢），個個想佢早瓜早著。
昨日飲茶，食肆老闆J哥喊咁口：「碌Sir，乜都立即加價，食材、燃料外，連外賣餐盒都狂加，因所有原料來貨飛升。更弊，人工冇得減。唉，咁嘅經濟環境，若全部轉嫁客人，肯定即刻冇一半生意。咁點？唯有自己硬食一半！」
「J哥，唔係喎，成街吉舖，就算樣樣冇得減，租金起碼會減吓啩？」
講到租金，佢才略有寬容：「咁又係，只要你肯鍊，租金減到好勁𠻹。我呀，新約就鍊平一半，二十萬元變十萬元，不過，租約上寫的，仍是交二十萬元。」
係咪好奇呢？點解會咁？乃因業主若畀銀行知佢減一半租金，即時物業估價急降，咁就大件事，可能要Call Loan，故死頂都寫返二十萬元。
寫二十萬元，實交十萬元，另外十萬元點呢？你有張良計，佢有過牆梯，業主回返十萬元畀租客，當清潔費、管理費、維修費⋯⋯總之大把師爺教路，令業主和租客Win Win。如今租舖，唔鍊價就笨！