黃秉華
特朗普自編自導自演一齣《雷霆救兵2026》，成為近日茶樓閒話家常話題最熱榜，我都好肉緊同朋友起勢咁講，講到蝦餃都涼了，仲有說不盡話題，原因大家睇荷里活電影成長的一代嘛，三十年前，湯漢斯加史提芬史匹堡這個美妙組合，帶來最超前的娛樂驚喜。
「今之伊朗山區上演《雷霆救兵》這一幕，比起《黑鷹15小時》更加刺激，我都話特朗普有運啦，今鋪又畀佢執贏。」朋友乙話︰「後來奇連依士活導演果部《硫磺島戰書》先至經典。」點解咁講？今次美國為咗拯救兩名飛行員，動用數十架飛機進行這個深入敵軍的不可能任務。「結果趕赴伊朗的美國飛機非毁即傷，但凸顯特朗普所言︰『我們永遠不會拋下任何一位美國戰士』，吓哇。」
「係，不過，你可能無為意《硫磺島戰書》的教訓，死守的日軍奉命瞄準戴有紅十字的醫療兵，見一個狙擊一個。」有印象，島上最高指揮官栗林忠道指示士兵這樣幹，目的就是從心理與物理方面，創傷敵軍作戰力與士氣。
「老兵常說，戰場上傷兵最麻煩，一個兵受傷，成隊人要被牽制，今次美國開了豪華團救兵先例，形勢唔係太有利。」明白，伊朗一定會針對特朗普弱點來打，事關白宮最怕美軍出現重大傷亡，搞不好，共和黨中期選舉危矣。
美國越打越驚，一旦地面作戰，點算好？無話美軍每次都零傷亡啩。
「美伊一定要談判，特朗普要收吓把口。」
係，大家食嘢先啦。