曾智華
今日標題，你會否窒一窒？喂喂，都快到季尾啦，潘頓早早篤定冠軍，贏咗近百場頭馬，排第二位的布文，五十場都未到，差十幾個馬位，根本冇得追喎。
對對對，但你知我知，過去幾年，香港馬場勢力分布嚴重失衡，「軟硬鞭」橫行，霸盡好馬，騎功又高，枱底枱面勢力龐大，當然可以隻手遮天橫行馬場，如此，邊有「公平競爭」呀？所以，潘頓個冠軍，係「冇競爭」形勢下的冠軍，好難令人信服。
不過，今日開始唔同喇，「雷神」莫雷拉空降回歸，佢騎功高「軟硬鞭」半班，若一齊由今晚賽事開始起步計，而潘頓仍能奪冠，咁就馨香得多嘞。男人個個愛威，尤其騎師，必有英雄感，今季餘下賽事，將精彩萬分。
加上潘頓的死對頭方嘉柏，話明想爭冠軍練馬師，如此，所有子彈必4、5、6、7月晒冷，若能贏得冠軍，肯定再一挫潘頓橫行銳氣，你話幾大滿足感！遠遠高過金錢㗎！
今晚賽事，小弟再施展「唔刨大法」，全揀莫雷拉，場場揸住放大鏡睇佢點跑，特別與潘頓短兵相接幾場，兩位高手點樣使出渾身解數互鍊。
今晚雷神出足九場，「軟硬鞭」只出七場，點解呢？後者若想騎，一定有馬揀喎。
講返小弟投注策略，一、二、三場W三串七；四、五、六場及七、八、九場也如是，十元一注，共二百一十元。
另外，一、二、三場P三串四；四、五、六場及七、八、九場皆如是，二十元一注，共二百四十元。
意即只捧一個莫雷拉，總共投注四百五十大元，然後臨場執生，睇睇邊隻有不尋常落飛，才決定如何加碼投注。早年雷神到港，似「食咗藥」，曾試過一日W八場，技驚全球馬圈，今番重來，唔可以衰畀人睇嘅。