風水陣轉馬運

黃庭桄

運氣這回事，很玄妙。當行正衰運時，可謂頭頭碰著黑，出街會唔小心踩狗屎；揸車會不慎揩花車身；一時心急冇睇交通燈過馬路，又會被票控罰款；搓麻將明明已經選擇棄胡，偏偏打邊隻就輸邊隻，邪到你唔信。

正如賽馬是偏門玩意，不少騎師和練馬師，都會經歷過低潮，連場搏殺都失手，久未嘗過贏馬滋味，於是他們都會去到車公廟上香，親手轉風車，以求轉來大運。

即使是外籍練馬師，也會入鄉隨俗，搵玄學師傅到馬房睇風水，希望能馬運亨通，旗開得勝。

像今季新加盟的南非練馬師桂福特，在開倉前特別請了七仙羽師傅，到馬房和辦公室大擺風水陣。結果就在馬季開鑼日，馬匹「伶俐驫駒」一出即入Q，打響頭炮。

今季桂福特的成績穩步上揚，已獲得十八場頭馬，他最擅長調教轉倉馬，剝其他練馬師牙骹，不少馬匹在其他馬房一直欠表現，一旦轉入桂福特馬房，往往一出即勝，表現脫胎換骨。

另一位南非鄉里練馬師韋達，連續三個月未在沙田贏過馬，為求打破悶局，上星期請來玄學家周凡夫，到馬房睇風水求轉運。又不得不信，睇完風水後，他在本周一的沙田賽馬日，贏得兩冠一亞一季，其中頭馬「紅旺繽紛」在過往十八戰都未入過三甲，似乎風水陣相當有料到噃。

如果另一個練馬師又搵周凡夫師傅睇風水，咁咪以子之矛攻子之盾，咁邊匹馬會贏呢？