24歲「A0女神」林愷鈴（Ashley）懶理死訊流言用心工作，最近推出第3首單曲《愛過》，獲緋聞男友英皇爆肌小生楊天宇（Angus）點讚，Angus更公開「認愛」話「有邊個唔鍾意又高又靚？」不過，Ashley原先形容跟Angus只屬普通朋友，後來才改口是好朋友、熟朋友！Ashley眼中朋友的定義好浮動喎。 採訪：方騫平 攝影：林賓尼 化妝：Owen Ko 髮型：Veron Chan 服裝：SANDRO
由林愷鈴作曲的《愛過》是3年前的作品，經4次修改後，最後交由小克填詞，Enoch Cheng和舒文一齊監製，因為歌詞講面對失戀，仍然要感恩遇見一段讓自己成長的愛情，故歌曲較為沉重。她分享錄歌時趣事：「舒文先創作一個電影畫面，我係片中女主角，由佢協助牽引我嘅情緒，其中『也許今次以後，愛戀不似以前，亦愛過』呢幾句，佢叫我唱畀自己聽，我感動得唱到喊。」
支持法律系胞弟入行
她直認有將新歌Demo畀多位朋友聽攞意見，包括Angus：「都多謝對方點讚，支持我嘅音樂。」談到早前她在社交平台上載一張男友視角飲咖啡相，相中的一隻手疑似是Angus的手，而2人也曾先後上載身處赤柱、淺水灣沙灘的獨照，被指「出Pool」Ashley衝口而出說：「大家普通朋友。」後來才改口話：「我哋只係好朋友啫，有嘢傾嘅熟朋友，都friend嘅… (了解中？)一切順其自然啦，相處得開心才會做到朋友，我得24歲，事業上仲有好多嘢想做，而且唔太想公開私生活，除非結婚先同大家分享。」對於Angus公開表明話「有邊個唔鍾意又高又靚？」Ashley流露出開心笑容說：「都多謝佢，自己係高，至於靚唔靚就見仁見智。」另外，弟弟林卓毅（Addison）為甄濟如做新歌《次次》MV男主角，Ashley大讚兩人好cute，又指媽媽龔慈恩支持法律系畢業的細佬入行：「如果姊弟2人並肩作戰都唔錯呀，但最重要係佢開心。」
