樂隊RubberBand參與《搶耳全球音樂演出及交流計劃》，今年曾到過巴塞隆拿考察當地嘅音樂產業運作。日前RB以「音樂大使」身份跟SOPHY Wong、 The Hertz (Herman, Ricky, Ray)、WHIZZ (王雨山、Moo、Bowie)、Kowloon K (Charlie、Justin)、Cozy Syndrome (Asana, Noel, Sarah, Gillian)及Charming Way在總結音樂節中演出。不過，啱啱娶咗黃心穎嘅「新郎哥」鼓手泥鯭（黎萬宏）及成員阿偉未有現身。6號總結西班牙之行能大開眼界，尤其能與海外音樂人及決策者交流，好開心認識到同行嘅新晉音樂人Gwenji、minor.、xxtilldawn：「尤其時下年青人有另一個模式，好多嘢我哋反而諗唔到，比如Gwenji會即興上網報名，完騷後馬上轉往德國另一個城市做音樂騷，由此可見呢班年輕人好爽快且有大無畏精神。」阿正補充表示：「雖然我哋有資歷，但並非只係教佢哋，而係互相影響對方。」
RB近日忙於為為聖誕節舉行嘅《RubberBand Juntos》演唱會綵排，6號指《RubberBand Ciao》演出模式已巡演了兩年，故今次會有新編排，他笑年紀大要背住歌詞先，因為近年已冇用歌詞機輔助。
Charming Way獲叱咤「入場券」
另外，由張明偉做主音嘅4人獨立樂隊Charming Way係Ear Up Global「舊生」，今年被安排往加拿大做音樂交流，張明偉感激搶耳音樂予以渠道帶他們到海外玩騷，從中認識外國搞手及志同道合嘅音樂人，笑言𠵱家多咗好多海外fans。Charming Way未來想試多啲唔同嘅嘢，包括唱多啲廣東歌，講香港故事，他們最開心今年已成功攞到商台《叱咤頒獎禮》及新城《勁爆頒獎禮》嘅「入場券」，讓他們見吓世面。
