「短腳」份人少年得志，基本上出道就紅唔使捱，未穩住腳就同「外省仔」愛得痴纏，激到啲經理人生蝦咁跳，決定送佢北上點知又畀佢紅到發紫，漸漸睇唔起香港呢個發跡地。
撈得掂嘅「短腳」又開始掛念出身地，因為當年紅得目中無人兼四圍點起火頭，當佢決定回歸，受過「短腳」唔少氣嘅相關人士，梗係唔會畀好日子佢過。「短腳」都好聰明，出高價請位經理人幫手，希望對方幫佢喺香港再振聲望，一心諗住自己喺內地咁紅，搵咁多錢，大家仲唔仆住嚟巴結。
哈，點知啱啱相反，你巴閉你嘅事，人哋唔賣帳你奈我咩何呀，總之佢啲新聞石沉大海，難為嗰位經理人講到牙血都流晒，依然令「短腳」唔滿意，好彩經理人都有啲人脈。但係「短腳」依然好刻薄，埋怨佢做唔到嘢。
然後呢，又唔知自己已經無乜人氣，本土客對佢印象唔好，係咁迫經理人做嘢，好唔容易搵到個肯畀七位數出場一陣就收工嘅筍job，「短腳」竟然嫌三嫌四，話自己喺內地有工作，死都唔返嚟，激到經理人生蝦咁跳，仲要成日鬧自己接唔到嘢俾佢做，呢啖冤屈氣，經理人絕對吞唔落，索性反炒佢魷魚，所以「短腳」完全絕迹香港，畀心機賺人仔，土味日濃囉！
【相關文章】：
星8卦丨「賊公」「賊婆」勢利靠「純情」上位後唔識人凑掂鮮肉繼續呃
