本周開始，小弟體內的腎上腺素開始慢慢飆升，因為馬季又開鑼，勁快樂呀！
度馬，當然要有馬經，今季將又有老牌馬報因這樣那樣原因停刊。但是這個市場永遠生生不息，兼且網上版絕不能取代實體版，故此大有市場。
點解？因馬迷要做筆記，也會用熒光筆Highlight必須關注的各項資料，若馬簿、馬報在手，絕對方便。用手機？點搞？根本冇呢種功能，就算他日有，也不似實體紙簿，可以隨意翻再一眼關七那種效果。
冇興趣跑馬之人，往往不知香港馬迷數目之多、投注額之巨，有幾驚人。
馬會高層掌握準確資料，每個賽馬日，非法投注額拍住合法投注額，總共接近三十億元！
即係點？唔該你計計數，假若每個馬迷投注一千元（打工仔 講，唔少 ），全球有幾多馬迷賭香港馬？
今季網上及電視賽馬節目肯定鬥餐死，小弟在此開檔，當然捧返《星島日報》場，次次開住iPad睇《賽馬日在線》。事實呢個節目贏在畫面質素最高（因有馬會官方支持）及資料詳盡，主持人之間因夠老友，可以無拘無束互窒講笑，充滿親暱氣氛，當娛樂節目睇亦無不可。
今番報章馬經又如何？等我話你知，肯定——戰情激烈。因「生果報」停刊後，大棚經濟富裕兄弟立即埋班，夾分 身大做。聽講由於各人都睇好前景，故連外來資金都唔要，個個私己真金白銀落水。如此，若成功，就可分得大大份！
對《星島日報》有乜影響？假若我是主編黃以文，必定歡喜死，因為：一、無敵是最寂寞，最是痛苦。你睇德甲拜仁與法甲聖日耳門就知，冇人同你鬥，打空氣咩？二、有得砌，問老細……加碼，當然手鬆，喂，要打仗呀！
今季小弟又如何？一於繼續提供符碌貼士，希望個個賽馬日令大家贏個早餐（幾謙虛？）。睇各廄陣容，明顯蔡約瀚、希斯、沈集成及呂健威四大馬房最勁！
