鍾嘉欣2013年曾於已拆卸的九展舉行首個個唱，已移居加拿大的她前年全面復出後展開內地巡唱，昨日她突然宣布回歸香港，明年3月圓夢首踏紅館，舉行《A Walk To Remember世界巡迴演唱會–香港站》。昨日嘉欣興奮向《星島頭條》透露香港站有全新歌單，12月會開記者會公布詳情，叫大家期待將會有好鍾意見到的嘉賓出現，但是否「管家仔」林峯則暫時保密。文：霍淇
鍾嘉欣宣布明年3月6日初登紅館，相隔10多年後再回港開個唱，嘉欣向《星島頭條》表示多謝大家的祝福，坦言當知道能在紅館開騷時超級開心：「真係願望成真，除咗係我嘅願望，亦係我啲歌迷同埋支持我多年嘅朋友、觀眾嘅夢想！」
嘉欣坦言由23歲開始做歌手出第一首歌和唱片，知道好多人支持她，所以一直希望回港開騷：「終於可以返嚟，我到時會好好enjoy the show！呢個係一個見返好多舊朋友，陪住我成長嘅朋友嘅show，所以我會好畀心機，會係一個全新run down。我好落力，已經成日開會，所以一定會係銘記於心，希望大家支持！」至於會否請「管家仔」林峯任嘉賓？嘉欣表示12月開記者會公布詳情，更大賣關子：「我一定會搵一啲我自己好鍾意亦同我有經歷、我相信大家會好鍾意睇到嘅人，會喺台同我一齊表演。」並再次多謝大家的支持和祝福，希望每場演唱會都能夠向大家發放正能量和愛。
大馬獲頒年度獎
此外，前日嘉欣獲頒馬來西亞第5屆《The Knights Award》「年度多棲演藝標誌性人物」獎，已8年沒到訪當地的她，坦言開心再見似家人的大馬粉絲，以前到當地工作都未能到處走走，今次爭取機會了解美麗的馬來西亞。
