黃秉華
聽君一席話，勝過焗桑拿。老友新加坡公幹，獲知當地美資顧問公司未來減少招聘六成人手，換言之，近百個原來安排給歐美名校畢業生的崗位，沒有了！「而且還會永久消失，你知點解？全因為AI可生成一百個識行識走、話頭醒尾、識中英日德法文的人才。一個Senior就夠，使乜請見習生？」好驚，好彩已經畢業N年，我無有怕，還要成日練習跟AI交流合作。
老友又話，咁搞落去，幾巴閉的顧問公司都會好快執笠，吓哇，邊有人花一千幾百萬美元寫個Proposal？「老友，你知唔知深耕深圳幾十年的高級英語訓練學校都灰飛煙滅咗好耐，有人話阿爺早就算到人工智能會越來越犀利，幾年前都放聲氣，叫家長唔好花冤枉錢畀仔女學英文。」
三十年前，我睇住科學城站深圳書城有間專為OL而設的英文學校起飛，然後今時今日全線執笠。「冇錯，跟住火燒連環船，中小學生英文補習班崩潰，然後內地高校要縮減學英文課程，理由好簡單——AI能夠實時生成翻譯。」
講吓講吓，我又出一身冷汗。專家話，中國年輕一代英文越來越差，目前出現「啞巴英語」的現象，事關英文可以由AI生成，但AI唔會幫你在現實生活「嘞嘞聲」咁講英文。即係點？中國除非好快成為地球最強，全世界自動自覺學中文，否則，後生仔講唔出英文，出席國際場面，會失禮死人。
我個心離一離，係擔心日後你出到去「嘞嘞聲」講英文，就真係「失禮死人」。