曾智華
上周提及，許冠文（M哥）太太鄭潔英（P姐），如何在五十多年前手到拿來，將萬人傾慕的本城年輕才俊收歸旗下，真真唔簡單。
好嘞，收歸後，又點能令M哥心悅誠服地一條心呢？正是P姐放棄自己所好及所惡，只以M哥所好所惡做人生最大目標。
例如，P姐先天討厭食魚，但愛郎M哥則是「魚狂」，日日無魚不歡，凡食到野生靚魚，即眼仔碌碌，開心表情浮現面上。
事實，M哥也不時出海釣魚，自釣自食。
但釣，釣得幾多？加上環境污染，香港附近水域水質日差，直接影響珍貴魚類生存，釣到的，味道也一年比一年差。
咁點搞？呢呢，P姐就勁嘞，早早買通南區包括香港仔及鴨脷洲街市海鮮檔，聲明：「有生猛野生海魚立即通知，隨傳隨到，唔講價，真金白銀現金交收，但咪點我，否則冇第二次㗎！」
你係魚檔老闆，遇著呢種客會點？當然神咁拜，一有好魚就即電畀佢。一收到Call，P姐連打麻雀都暫停，立即命司機出發。
P姐既然以令愛郎快樂為人生最高目標，故此，每次買到好魚，清蒸（M哥指定清蒸，原汁原味），上枱後，若見到老公面露滿足：「老婆呀，呢條魚堅正呀，有海水味㗎！」此時的成功感，真是千金不換。
「碌Sir，靜靜話你知，點解M哥80幾歲仍冇老態，生生猛猛，皮膚嫰滑，精靈幽默，眼仔碌碌？全因長年日日食到靚魚，開心快活，毫無煩惱，點會唔青春常駐呀！」
P姐咁多「橋」冧丈夫，小弟決定請佢開壇教其「𠱁暈老公大法」，好嘢不應自己收埋，多多分享，令更多夫妻生活和諧，對對好似佢哋咁，歷五十多年仍然情不變，如膠似漆呀！