曾智華
上周五打開本報新聞版，內頁頭條大大隻字：「Hotstone Yoga突全線結業，苦主至少300人」。
嘆完一聲後，也有少少奇——喂喂，呢單算唔算大新聞呢？點解張張報紙大肆報道？無他，因為呢種騙局，香港無日無之，存在已經幾十年，遍布各行各業。說來雖非所有優惠預繳皆是騙局，但事實又發生過N加N咁多次，試問香港人有幾多個未試過中招？
好啦，當你中完一次又一次招之後，仍信優惠預繳，即你可能已計算過，慳錢與風險間的經濟效益比較。
老友，點解優惠預繳騙局盛行幾十年而不衰？正因：一、任何公司推出優惠預繳，乃商業行為，並不犯法。就算佢個計劃筍到完全唔真實，擺明亂放蛤乸，也不是犯法。二、一旦爆煲，主持人被捕，也很難有足夠證據刑事起訴，證明蓄意行騙，尤其大多早已有法律界人士教路，早早設計金鐘罩。三、消費者貪便宜。
這就解釋到，日日咁多人行騙，很難阻止外，找到足夠證據起訴並成功入罪個案，少之又少。既然少之又少，等於騙徒行騙的機會成本，相當之低，變相促成更多人從事非法及合法（𠱁你買金融產品，但永不講陷阱）行騙活動。
咁點搞？靠警方保護？幾乎可以講無用（小弟嘜頭過去幾年不停被利用行騙，報晒案，丁點行動都冇，騙徒繼續照做）。故此，大家唯一可做，自己保護自己。
小弟做法，凡優惠預繳例不參加，畀貴一點冇問題，總之鋪鋪清。此乃早年參加過健身院及購買影視券中招後的決定。當年有冇報案？冇！因知道報都嘥氣，當買個教訓算了。
香港行資本主義自由營商制度，如此，就必出現「孖仔」，即騙案。