曾智華
習近平主席訪美雖完畢，但所有細節及政治符號，仍在不同媒介上發酵，大家不停分析、拆解、猜度所有現象。
其中較有趣，為外籍記者拍到一張照片，習主席出席國宴時，面前有一個保暖壺，大為好奇，因在西方禮節上，絕對罕見。
小弟一眾百厭星朋友，在社交媒體熱烈討論，究竟保暖壺內是甚麼，天馬行空聯想包括：錄音機、攝影機、槍械、胡椒噴霧、炸彈⋯⋯
其實此乃內地文化。尤其上年紀者，著重養生，故人人經常暖壺隨身，沖自己喜歡又或有特別配方的茶；要求更高者，連水也講究，自備。
這個，西方人來說，當然是新奇之舉。這又令我想起二十多年前一次午飯。
當時，某中間人提出：「碌Sir，有一位內地隱形富豪，身家過百億元，甚麼生意也有，除咗傳媒。剛剛亞洲電視放盤，叫價26億元，富豪有興趣成間買起，但對香港電視台生態一無所知，你可否約多位電視台高人與佢午餐傾傾？」
某個陽光普照下午，隱形富豪、電視台高人及我，就食咗頓三小時但唔知食過乜的午餐。
富豪坐低，正正似習主席，一嘢就放咗個保暖壺在面前，見小弟眼神好奇，於是講：「我輩內地人，做大事的，都極著重健康及養生，故各有秘方飲料。我每日工作十六小時仍精力旺盛，乃因呢壺特別炮製藥茶，試唔試？」
嘩，咪搞，都係講返正經事。
話題打開，富豪果然對香港電視圈一嚿雲。高人及我作出警告：「你一旦踏足電視圈，將被逼變透明人及狗仔隊『咬』的對象，閣下一切背景以至財富何來，將被全挖出，當然包括私生活及情史等等，有冇心理準備？」
一餐未罷，富豪嚇到面青，即時拜拜，返回內地。