宇宙浩瀚，發生的事，人類能知多少？可能只是皮毛。故此，當我哋對一啲現象解釋時，無論用上幾多科學論據，最終部分仍是得個桔。反而從中國遠古時代的天文地理曆法，可以得到某些答案。
上周四與一群資深醫生晚飯，酒過三巡，「麻醉S」若有所思話：「唔，終於捱過舊曆七月嘞，今日是最後一天，希望明天會更好啦！」佢講完，在座也有兩位大國手點頭認同。
講乜？正是相傳農曆七月鬼門關打開，病人特別容易出事。故此，免得過，某啲家屬幾大唔畀病人在農曆七月做大手術。更甚，若能拖，連孕婦開刀都避開農曆七月。
你可能話迷信，但年復一年，起碼我都見咗七十年，凡到舊曆七月，就通街有人燒衣拜祭，當中絕非純是老人家，觸目所見，後生女絕對唔少（奇在後生仔則絕少）。例如土瓜灣靠背壟道樂民新村一帶，就成條長蛇陣咁，難道佢哋全部盲目蠢人？
「泌尿Y」亦認同「S醫生」所言，醫生多在公立醫院開始工作，見證公私醫院兩大陣營，前線員工凡在農曆七月就心情特別沉重，而管方亦隻眼開隻眼閉，容忍（不是鼓勵）員工在醫院範圍內，低調燒衣拜祭亡魂。
「麻醉S」更講出一個特別個案，為一位阿伯，農曆六月出院時，龍精虎猛，乜事都冇。但農曆七月突然見佢再入院，嘩，乜變成咁，面如死灰，周身冇力攤在輪椅上，結果……
與資深醫生晚飯，耳界大開，不少現象，普通人聞所未聞。
例如全部見證過富豪病人末期時，家人出現的劣質行為，非常「獸性」，毫無人性，為爭一毫子遺產都會打生打死。
資深醫生結論：「我早預告全部身家捐慈善機構，一個仙不留後代，大家冇得爭！」