AI金融有佳音，Kimi K3母公司、有「AI六小虎」之稱的月之暗面將上市，之前智譜與MiniMax升到嘭嘭聲，如果連埋百川智能、階躍星辰、零一萬物，六小虎齊集香江，一、六兄弟股價不得了；二、因為根據「龍珠效應」，全數湊齊，香港就有如鳥山明筆下的孫悟空，喚出神龍助力，到時真係宇宙無敵。
「好，唔睇得太好；淡，又唔好睇得太淡，老友，你估細個睇《龍珠》卡通片呀，投資唔係講得笑。」你最好笑，成個龜仙人咁高深，食飽包未呀？「不過，又確有道理，機械人股上市升過千大元，依家得返一半，小心駛得萬年船。」吓哇，我幫你哋講埋都唔怕，外電起勢咁講︰中國AI小虎比起美國AI元祖，兩者技術仍有好大距離，例如ChatGPT推出最強模型，威力驚人，簡直贏足一條街。
「師兄，你當ChatGPT係古拉，Anthropic係弗利沙？」差不多啦，如果你要講故事，不如講返《西遊記》。「願聞其詳。」嗱，即係咁，好似大師兄咁，成個唐三藏，一生最怕妖魔鬼怪、蜘蛛精之類，成日坐懷不亂，見到好嘢不敢動半分雜念，如是者，作為投資修行的最高法則。大師兄實在不宜涉足大上大落的科技股，最好唔係做定期，「咁，你有乜心水？」最好係認購銀色債券，政府新一批發行的保底息率4.25厘，今次買唔到，可等待下次機會。
「咁講，不如花20蚊買張六合彩，既可能幸運買中，又加有一個希望。」
無嘢講啦，大家飲茶。