黃秉華
快時裝似乎有點過時，歐美媒體起勢傳播現在跟風已經遲了，皆因風口期已過。借問一聲，歐美最近哪個行業最得？中環上班族尚有好多後生仔女要執得正，唔會好似矽谷企業，為傳揚自由，大家穿便裝就OK，快時裝都係時裝，點會無得做。
「西方觀點錯唔晒，你咪當自己好叻。」「願聞其詳。」所謂快時裝也者，唔係Hi Tech是Low Tech，毫無技術含量，廣東省是製造快時裝基地，支撐生產幾千款時裝應市，靠的是上世紀五十年代的港式製衣業，即係化整為零，無大廠生產，主要係蚊型山寨廠。《紐約時報》說這裏「看不到人形機械人、量子計算機或最先進的技術設備，只見幾十名工人每天工作十到十四個小時。」點評一句︰「它代表的是舊技術，而不是新技術。」
你以為內地周街機械人，你還質疑中國工廠沒有量子電腦，真係有點過分。「唔好咁講，大家睇得起中國，其實，中國應該集中研發製造晶片、數據中心、人工智能、航天任務。」快時裝靠「非勞逸平衡」工廠生產，工人做超過十小時，冇陰公囉。
《紐約時報》據稱獲得美國非營利組織「中國勞工觀察」的報告指出，廠商為趕貨，工人曾連續工作二十天，甚至更久，沒有一天休息。訪問咗幾多工人？「該組織訪問十三名工人。」吓？不過明解嘅。根據《苦海孤雛》情節，廣東一定有好多童工，萬望組織再查明真相，主持公道，救出工人，那就功德無量，吓哇。