曾智華
內地電影，從不是我杯茶，尤其主旋律電影，更難提起興趣。
但有三個導演，無論拍乜，小弟多會入場，因論功力、論級數，三位皆大師級，單單睇佢哋表演導技，肯定已值回票價，兼多數都能帶你到一個新境界。
未入場看《抓特務》前，聽到的，皆是呢套嘢票房PK，完全唔掂喎。
票房掂唔掂，從不是小弟決定會否入場原因，例如《功夫女足》，在內地票房極勁，但無法清楚解釋，就是提不起勁入場。反之，肯定票房慘淡的《廚師發辦》，我就第一時間入場，覺得好享受，立即四圍推介。
《抓特務》，只睇到三個名字，已經肯定A級製作，因超班導演及影帝級演員，從來不輕易出手，一出手，幾肯定是質素保證。
故此，馮小剛、雷佳音及胡歌願意執導及演出，已毋須再問理由，唔入場，點算影迷？
影片難拍，因內容橫跨近四個年代，由1949年開國大典拉開序幕，一直拍至1985年。在這三十七年，中國曾經歷翻天覆地改變，如此複雜題材，實在非常難駕馭。
所以，由導演到兩位男主角，所面對的挑戰，實在極高難度，交出甚麼成績，大家入場啦。
電影開始時，描述國民黨敗走台灣，只留下特務負責刺探敵情，此角色由胡歌演出，劇中人在教師包裝下，暗藏特務真身凡三十多年，內心的碰撞與掙扎，冇影帝級水平，點能拿揑得到？
對手雷佳音則扮演共產黨警察，負責捉拿特務，由零開始，直覺上肯定胡歌是特務，但苦無證據，於是，索性搬到胡的樓下居住，望搜羅到真憑實據。
關係互動凡三十多年，涉及家人與下一代，由勢不兩立的內心死敵開始，隨著時勢變化，最尾一場演技大爆發，真勁！