黃秉華
我要對所有書本作深情的懺悔。「搞乜鬼，你又唔係咁鍾意睇書，你睇AI短劇之嘛！」師兄，你有所不知，最近傳來關於書本的噩耗，有太多舊書為人工智能系統而捐軀。
「我自小有逛書店狂買書習慣，買埋買埋，一到搬屋就要成堆成堆運去垃圾房。」我真係好對唔住書本。據說，人工智能睇書速度驚人，好快閱畢坊間新書，AI廠商現在全球搜刮舊書，以保持人工智能的「聰明」狀態。「係？又關你乜事，你舊時的書都丟晒啦。」
話說，廠商無良至極，為了「餵養」AI系統，又要求效率速度，凡是買來的舊書，唔理三七二十一，立即把書脊割去——方便自動化翻書，一頁接一頁，過完機就即棄——愛書之人話，舊書遭逢浩劫，要求國際關注。
「我想起之前有好多書一頁未翻，擺擺吓變成棄物，嗚呼哀哉，何其性之忍耶？」咦，真係噃，「你咁大嘥鬼，其殘忍程度堪比貓捕雀。」課文重溫︰「哀哉！貓一搏而奪四五雛之母，人雖不及救之，未有不惻焉動於中者。而貓且眈眈然，唯恐不盡其類焉。烏虖，何其性之獨忍於人哉？」薛福成《貓捕雀》。
AI有如「焚書機器」，對舊書毫無憐憫愛惜之心，就如貓一樣，無性的啊。
「你唔使咁後悔，你又唔係搞AI生意，日後唔買書咪得囉。」咁都得，橫豎都係成日睇短劇、社交媒體啦，我一於繼續支持環保，唔用塑膠飲管之餘，仲要拒絕買書，支持舊書生存，你話好唔好？