智能機械人真的不是用來商演的，係未來的戰士，代替真人上陣，或者至少為真人打頭陣。台灣開了一個機械獸聽證會，接受各界代表測試「台灣製造」得定唔得。有位退役將軍老實不客氣，上來就一下猛推，機械獸四腳朝天，好辛苦才翻身。咁，你話佢打得唔打得？
「商業應用才是賺真銀的嘛，打仗好少機會發生，靠佢成軍，蚊都瞓啦。」呢位阿哥，你就有見識，幾年前我在內地參觀科技展，有位老闆就問廠商︰「幾時可以推出智能機械人保鑣」，佢話要一次過訂五台咁話。
機械人保鑣？有得諗噃。「梗係，一於預埋你啦。」老友服務大公司幾十年，最近轉行搞AI，「吓，唔知佢有冇睇啱呢條路？」香港科技最叻應用，早幾年去大灣區睇初創公司，一間做貨櫃物流公司，就係從馬料水科學園引入搬貨機械人，好使好用。
「啱聽，香港有李小龍、成龍，又有一代宗師黃飛鴻、葉問，仲有宇宙最強甄子丹，人強馬壯，香港專門打造好打得智能機械人，直頭係掂！」
智能機械人在內地已經形成生態圈，零部件供應商在大灣區星羅棋布，又有好多技術人才，以香港人的眼界與商業轉數，唔敢話勝過內地，但點都可以「超英趕美」，吓哇！
我諗諗下，越諗越有諗頭，如果AI系統可以Text to Robot Design，我就朝兒時夢想出發咯。「搞邊科？」嗱，唔係嚇你，我就砌台「地球先鋒號」機械人，一於保衛地球。