近日多名苦主疑墮美妝店推銷騙局，被高壓推銷購買數萬元產品，掀全城熱話。香港美容界龍頭「瘦身教主」Dr. Angel唐安麒，近年以「審美官」身份活躍社交平台分享正能量、護膚及瘦身等身心健康資訊，早前亦曾率先揭發同行的離譜營銷手法，呼籲大家要靚得精明，「警世」影片近日又瘋傳，不少網民指她「沙膽唔怕死」，夠勇冒人身安全之險發聲。
唐安麒表示早有聽聞香港美容業有害群之馬，被稱為「劈場」的美容院，以各種高壓「Hard sell」推銷手法，疲勞轟炸顧客購買療程，甚至即場游說顧客申請財務貸款來分期支付。
唐安麒說：「呢啲劈場嘅老闆，直程喺隔離開埋財務公司！愛靚無罪，貪靚無病，有啲客人就係誤信劈場聲稱『無效會退錢』嘅廣告，一上去就被人『劈』，初時話個療程只係幾百蚊，但當你除晒衫做療程時，幾個美容師圍住你，話你呢度肉酸嗰度肥，令你一時衝動碌爆你張卡。呢啲美容集團，我開名都費事，根本冇用，因為今日開完，聽日佢哋又會改名！」
盼大眾靚得有智慧
對於被網民指「沙膽唔怕死」勇敢發聲，唐安麒說：「美容界存在好多黑幕，幾十年嚟有增無減，幾離譜都有！的確好多年前開始，已經有粉絲勸我『禁聲』，免招惹敵人，但係我唔驚，點解我要驚呢？我出聲，揭發不良手法，目的係提醒大家，要保持清醒，要精明消費，靚得有智慧，而唔係叫大家嚟幫襯我！真正專業同可靠嘅美容中心，係在乎顧客嘅需要，只會建議邊啲療程適合你，唔會hardsell，美容顧問係幫助你解決問題，令你更靚更自信，帶住愉快嘅心情返屋企。」
