曾智華
一塞激起千重浪！
周一本欄標題是《毫無功德/常識的人》，講及我住所其中一幢大廈塞渠，搞到二樓阿伯大扯火，因污水由馬桶倒灌而出，成屋被不堪入目的水浸滿，真係人都癲，自然大力向管理處施壓，要求火速搵通渠師傅急救。
在香港，無論是貴價或平價樓，只要是一幢幢的大廈，居民必經歷這樣那樣的頭痛問題，包括冷氣機滴水、天花滲水、塞淤水渠⋯⋯所以，大部分人也曾有這種經歷與激心。故此專欄一見報，反應相當洶湧。
有通渠師傅留言（本欄真的甚麼讀者也有）：「碌Sir，在小弟通渠生涯中，由淤塞渠挖出的，除你講到的塑膠袋、衛生巾、毛巾、不溶濕紙巾外，更難想像的還有成支牙刷牙膏、大大塊百潔布、長竹籤、筷子湯匙不鏽鋼叉、雞骨豬骨牛骨⋯⋯當然，最多是避孕套，有啲離譜到連包裝袋都未開，怕且係⋯⋯被人撞破，要立即毁滅證據啩？」
唔知好嬲定好笑！
毫無功德搞到塞渠，你咪以為只要通一通即掂，錯！原來污水倒灌，除咗可能搞到成屋一團糟外，老友M姐的慘痛經驗，為大廈電錶房都浸埋，停電一日，再要急Call電工到場處理。
講到塞渠，令我想起五十年前到美國留學，發現有極多諗都未諗過的先進家居設備，其中之一為家家戶戶幾乎都有的「化骨龍」。任何廚餘，就算骨頭都冇問題，全倒入洗碗盤去水位，然後撳掣開「化骨龍」。犀利，兩三分鐘後就可將一切打碎，然後開水一沖，立即乾手淨腳，永無塞渠的憂慮。
返港後不停問各式專業人士，包括水電師傅及電器供應商，點解香港冇「化骨龍」？從冇人畀到一個合理又具說服力的答案！