曾智華 精彩人生自己創
上周經過家居管理處，有位阿伯情緒非常高漲（即係好鬼嬲）地不停投訴，剛剛我在等網約車，又聽吓發生乜事。
哦，原來阿伯屋企洗手間的馬桶水倒灌，湧噴而出，極核突，肯定是塞渠，於是向管理處投訴。經理已第一時間搵師傅，但總不能一撳掣就出現。
阿伯好煩，猛咁施壓，因屋企流滿污水，確是扯火有理。換轉任何住客，反應可能也一樣。
兩天後，大廈所有住戶都收到一張通告，主題——污渠淤塞維修事宜。
原來阿伯洗手間「大災難」，乃因污水渠管及沙井塞死晒。點解？講出來又的確幾令人憤怒。
話說當通渠師傅來到，用工具通啊通之際，挖吓多啲，挖吓又多啲，哎吔吔，邊個（多個？）咁鬼冇公德呀，竟將大量無法溶解之物倒入廁內，咁搞法，唔塞至奇。
係乜呢？離晒大譜！包括：塑膠袋、毛巾、不能溶解的濕紙巾，以及⋯⋯女性用衛生巾！其實正常人都知，無法溶解的物品，絕不可掉入廁內，因塞梗。你自己廁所塞之外，渠通全層，肯定累街坊！
水向下流，所以，越住得低，越易中招。阿伯正正住在二樓，故食到應。
冇公德心者，一方面禍及其他住客，也令「阿公」次次付數千元通渠費。
小弟當然唔知邊個亂掉嘢入廁所，但邏輯推斷，只有兩類人：一、冇公德心者；二、冇常識者，又或「一」及「二」皆兼備者。
說來，我住的大廈已有五十多年歷史，多是一住就不會搬的老牌戶，大部分斯斯文文專業人士，以往甚少聽聞會掉咗不溶物體入廁的，太無常識了。若排除是這裏的常住老牌戶，還有哪些人最可疑呢？
有冇「讀者神探」，能從通渠師傅挖出的污物去「破案」呢？