曾智華
前朝七點踏入茶記，發覺的士大哥一枱個個情緒高漲，爭相發言。
喂，乜晨咁早就如此興奮呀？有乜「好消息」？聽真啲，哎吔，原來在講一單血案。吓！血案都令佢哋咁投入，乜事呢？
正是一名內地漢周三凌晨到旺角「撳鐘仔」搵「一樓一」，當時一名蓄長髮及穿白裙的女子開門，內地漢見對方有喉核，唔知點解雙方竟先而拗撬，再起爭執，終於有人用利器襲擊內地漢頸部，搞到鮮血直冒，非常凶險。
的士大哥摩拳擦掌討論，因此案涉及「一樓一」，以及懷疑「女子」其實是「男子」，故踴躍發表意見，講到好似個個身處現場。
高佬：「死咯，呢單嘢，若拉到個『有核女』，佢分分鐘被控意圖謀殺㗎。大佬呀，拋條身出嚟搵食啫，做乜咁衝動呀？好似唔多啱數噃。」
矮佬：「咪係囉，個客又係嘅，見到喉核，大家成年人，講句——唔好意思，下次！咁咪乜事都冇，如今搞成咁，睇嚟可能講咗啲唔應該講嘅嘢，刺激到對方！」
肥佬：「其實並非『女人』，扮『女人』接男人生意，有乜出奇？先前北京嗰位人人話『食唔落飯』嘅，一樣賓客如麻，不少客人更話『唔嚟都嚟咗咯』，咁又做成生意，相安無事。」
打開報紙睇呢段新聞，哎吔，今次記者竟可閃電咁快去到現場，故能將事主真實樣貌拍下曝光，但⋯⋯部分報紙又唔打格又唔遮面，好似有違新聞道德喎。若事主有妻有兒女，好易令人家都散埋㗎。
近期香港經常有啲唔合常理、唔合邏輯的噪動血案，本來只要其中一方退讓，又或講聲對唔住，就乜事都冇，但竟選擇硬砌，連搭小巴爭執都搞到死人，完全異乎常理。當事人冷靜下來，必揼爆個心，後悔到暈。