黃秉華
中國AI科技股有冇運行？睇個勢就似有嘞，當下最熱又最勁的國產「月之暗面」（Moonshot AI）據報加快走緊內部流程，相信趁熱打熱，六個月之內在香港上市。
「有乜出奇，唔通『月之暗面』去美國上市呀，你都霎戇嘅。」我讀得書少，不過成日上網看新聞，你估我唔知楊植麟係乜料咩？「知，你講嚟聽吓啦。」厲害了，我的潮汕朋友，1992年出生，考入清華大學未算威，之後赴美國名校卡內基美隆大學（CMU）攻讀博士，師從美國AI大師，被師傅讚許為「絕對的天才」，被安排到Google Brain與Meta實習，成為矽谷最熱人才，老闆爭住搵佢加盟，可惜，這位天才決心創業，回國「為人民服務」。
「係咁，楊大哥得罪晒美國人。」佢旗下「月之暗面」推出Kimi K3，效能直逼美國最強Anthropic與OpenAI頂級模型。「你喺美國讀AI，唔做美國人，不為美國人民服務，點講得通？」
「月之暗面」如果去華爾街上市，一定有人狀告楊植麟竊取機密、抄襲美國專利技術，嚴重的話，可構成不同的國安罪名，吓哇。「一句話，你想講去美國讀書就等於入咗天地會？」差唔多啦——陳近南（劉松仁演）同韋小寶（周星馳）講天地會幫規，其中：「背信棄義犯了本會會規第八條，要斬一手一腳的！」註︰電影純屬虛構，如有雷同，實屬巧合。
「我哋講科技同埋港股啫，你撐到去《星球大戰》咁遠。」唔係噃，我講《鹿鼎記》之嘛，唔啱Channel？不如食個包啦。