曾智華
小弟的「獨眼龍」經歷，今日終結篇，希望一世都唔使再寫喇。
兩個小時全身麻醉手術後，推回病房過床，咦喂，急尿喎，即時反應，起身去洗手間。點知立即畀護士喝住：「唔可以落床，麻醉藥未過，企唔穩會跌倒，小便用鴨仔啦！」
「鴨仔」係乜？正是男病人用的尿壺。呢味嘢，小弟已與佢絕緣五十年。話說1976年在美國撞車炒大鑊，左腳斷裂外露（Open Compound Fractures），因當年冇保險，醫院只用紗布包住，就請我「另請高明」，無奈坐輪椅回港，入瑪麗醫院駁骨，用大大支鋼片鎖死斷骨，痛到黐肺。
同房病人不少為「鐵騎士」，在馬路飛馳好似好威，但一炒車，個個唔成身粉碎都斷幾條骨，一如我，冇得落床起碼一兩個月。
點搞？當然靠「鴨仔」維生啦，初初用，真係要靠內功逼出尿尿來。
五十年冇見鴨仔了，如今幸而只相聚一晚，似唱黃凱芹名曲《再遇》！
覆診見醫生，檢視眼球傷口，冇異樣，但跟進要滴幾種眼藥水，主要是抗生素及類固醇，以防發炎。跟住，X醫生就似老師教學生咁款，忠告短期內注意乜。
「曾先生，你必須注意以下事項：一、不要動氣，勿激心，情緒要保持平穩；二、大便冇就勿夾硬去，因一用力谷，就會影響未復原的血管；三、沖涼時戴膠眼罩，防止水喉水入眼，以免滲入細菌；四、傷口未全埋前，一定要學習慢活，總之，乜都慢，動作慢，說話慢……」
臨離開前，再由護士教老婆大人替我滴眼藥水及清潔眼邊，原來乜都有學問。
每次發生事，都會透過傳媒與大眾分享經驗，今次不例外，望我的經歷，你千祈咪有。