卷呀卷，內地的內卷，不經不覺也席捲到香港，作為零售商，一係參與鬥卷，一係自己退場唔玩，任揀，冇得唔郁等運到，瓜硬！
大戰中，王維基最勇，輸人唔輸陣，高調揚言大家鍊過，睇吓邊個失血最多，企唔住倒下！老王作風就是如此，兼專喜歡高調挑戰巨人，呢鋪睇吓結果又係點。
其他集團呢？例如日本城，不停度橋減價，藉口及折扣月月創新花款，睇到我都亂晒，明智決定，乜都唔買住，因可能越賣越平。
另外兩大超市集團又如何？平日唔多郁，一郁就重錘大減一日——全部八八折！
呢招近來每月出一次，多選大節前，例如母親節及父親節前一日，就全單八八折。之後，就縮返，故此，精明消費者（我算嗎？），平時一定會忍忍忍，必需品都只買少量，一於忍到八八折才重手出擊。
兩大超市好過癮，名為直接競爭，實質消息互通，絕無玩攻其無備。所以，要減就一齊減（乜咁似油魔㗎？），一齊搞旺一日，令全港消費者湧去掃貨。
小弟與老婆大人，朝朝早餐後就行超市，睇睇心目中貨品價格走勢。
我睇乜？當然是紅白酒、啤酒、汽水及雞湯之類啦，因每日消耗不少。有樣奇，基本所有貨品，兩間超市都相若，但唯有葡萄酒，「惠記」長年八五折，但「百記」則已經幾個月冇呢支歌仔唱，好似放棄呢個戰場咁款，唔明。
論買紅白酒，我也會忍，因忍到大時大節，兩間超市集團再會突然殺出買得多就八折一招，如此，唔掃足幾個月用就笨啦。
說來，睇超市廣告，邊份報紙最好呢？小弟博覽群報，肯定《星島日報》最齊全，尤其周五，幾百樣貨品紛陳幾大版，全部落齊價錢，讀之也是最佳娛樂啊。