人生流流長，我們的際遇，一定會起起落落，這是正常而非反常現象。
所以，成熟的人不應像BB般，高興就笑，唔高興就變大喊十。反之，要有充分心理準備面對一切，好的、唔好的也要硬食。
小弟最怕見到負能量之霸，開口埋口就怨，怨天怨地，怨上司怨下屬，怨朋友怨親戚，當然怨埋政府及所有掌權人物，彷彿世界只有佢啱晒，其他人一律錯晒。
這種人物，我點對付？就似撳電腦Delete掣一樣，非常決絕將佢哋全部掃出生命之外，唔理唔見唔應酬。
老友，你都試吓咁做吖，舒服晒㗎。當然，仍在搵食一族就要忍，因你的薪酬內，早已包括處理討厭的人（當然包括你上司）。
講講小弟面對人生負面情況時，抱乜心態呢？正是唔XXX唔會死嘅。
XXX代表乜？所有你希望享受得到的一切，包括：做議員（送畀黃錦輝）、去旅行、飲紅酒、睇跑馬、食靚嘢、睇英超、睇電影、談戀愛、做運動、窒權貴……
以上，你當然喜歡，當然想做，但當形勢比人強時，就要忍一忍，停一停，咁會唔會死？當然唔會。少少唔順意，忍一時風浪，接受人生一點點遺憾。
過去幾年，大家心照，香港出現的不少轉變，你我都未必願意接受，小弟感受較深的，是電子傳媒失卻動力及影響力，不可以再大鳴大放。
但正如鄧小平名言——大氣候不以個人意志為轉移。世界不停在變，變化的方向，未必如你所願。看看曾經不少人夢想移民的美國，自特朗普上場後，日漸墮落，完全違背二百五十年前建國的大理想，不少美國人表示痛心疾首，咁又點？撼頭埋牆？暫時最佳方法，是以與特朗普鬥長命心態應對。