曾智華
香港人，有一非常珍貴自由——出入自由，故此，想移民邊度都得，只要對方國家肯收你即掂。
小弟認識「移過民」（已成外國人在外定居或已回流）的朋友，最少幾百，事實上，香港人移過民的，則最少有幾十萬。我輩最多是移去加拿大，來來去去、去去來來者不知凡幾。近年形勢有變，不少去咗歐洲，特別是英國。
正因大家來去自如也自由，近十年加國大量長者老友突然興起回流，但並非回流定居香港，而是北上大灣區，以中山最多。
點解？無他，大家都已經七老望八十，若踎喺加拿大，揸唔到車的話，等於跛咗。另外，年紀咁大，行步路都震震吓，當然唔想做家務，最好有人幫手搞掂晒啦。
但在加拿大請外傭，難若登天，負擔驚人。退一步，想有人照顧，你也可以申請入住長者中心，但一定排餐懵。小弟加國親朋戚友，不少年年回港度假，順便遊台灣日本泰國及到內地食食食。見內地近年的醫療及長者中心質素大幅提升，加上大量新樓空置，租層千呎單位，再請個工人全天候服侍，都只一萬元左右，怎不心癢癢回流？一個係咁，兩個係咁，如今已經不時一團團，專誠到順德中山東莞珠海參觀。
另一邊廂，小弟也有個別老友決定由倫敦回港，點解？原因N咁多，其中之一，竟然是熱到頂唔順！
在香港，出入有冷氣，尤其瞓覺，開住冷氣，起碼有覺好瞓。但在倫敦，如今夏天可以熱到攝氏四十度，人都癲，最弊當地文化及制度，安部冷氣難過乜。怕熱的老友搞到晚晚失眠，唯有租酒店，普普通通都要二百英鎊，點頂？
移民倫敦有N個理由，回流，也有N個理由，睇老友個痛苦樣，畀香港冷氣寵壞了。