「碌姥姥」係邊個？小弟囉！
1990年至1992年香港最高的建築物中銀大廈（中文名麻麻，因「大廈」通街都係，舊區也不少，冇氣勢！反而英文好掂——Bank of China Tower），落成後立即成為全城話題，尤其商界、政界及……風水界。
因其設計非常之具攻擊性，外形鋒利，呈三角柱體，多面切割的主面如寒光四射的利刃，劈向四周，令人不寒而慄，尤其食到應為當年港督府（即今天禮賓府），以及英資的匯豐銀行總行。
是有心刻意設計，抑或巧合創作？肯定幕後人知答案都唔會公開講，留下一個大大的謎團。
我乃好奇市民一分子，多年來一直很想入去參觀，體驗由高望下那種君臨天下的氣勢，奈何用乜身份呢？
等呀等，機會終於到了，與中銀集團關係密切的老友宴客，叮，正正是在中銀大廈六十八樓貴賓廳。正！坐的士去，一下車已有穿黑色西裝禮賓人員接待引領，先上四十八樓，再轉𨋢到六十八樓。
從落地玻璃向下望，果然有大地在我腳下之氣勢，整個中環各大財團總部，全部比下去，只有遠望的幾幢新建築物，可以互相在高度上比拼。
主人家講到這幢由熊谷組興建，蜚聲國際設計大師貝聿銘的作品，一方面讚歎大師的功力非比尋常，但同時也指出超支了八千萬元！點解？因大師要求絕高，連擦外牆的化學藥水也要指定。
中銀大廈最引人入勝的，為其風水陣，你信唔信都好，總之落成後，冇一個港督或回歸後入住的特首能順風順水，全部麻煩多多出問題。
Touch Wood，今任的李家超，希望能打破宿命，安安穩穩坐到明年6月底，再看會否連任啦。