曾智華 精彩人生自己創
上世紀七十年代尾，小弟在《歡樂今宵》做助導，日日「侍奉」班編劇大哥大姐，懇求佢哋準時「嘔」出趣劇劇本，好等我可以火速落單訂道具、服裝、化妝。因當晚準時直播，分秒必爭，工作一環扣一環，編劇唔出稿，乜都無法展開。
但編劇也是人，日日嘔趣劇，間中都會大腦便秘，面對死線，點搞？
最後一招是死人尋舊路，抄！抄乜？當然是外國及香港電視劇趣事！抄得最多的，是《雙星報喜》。總之將許冠文角色交由盧海鵬演，已經掂晒。
天下一大抄，其實電影電視，有不少「橋」是你抄我、我抄你，總之改頭換面改時空改人物，好易搞掂。扭一扭，扭得好就又可大賣。
例如韓國大隻佬馬東石，2017年推出《犯罪都市》，講一個嫉惡如仇身形龐大警探，面對一眾「城市垃圾」（匪徒），次次以赤手空拳將佢哋打個稀巴爛。
之前，當然描述班「垃圾」無法無天欺負善良，但依正手續辦案未必奈得佢哋何，此時，觀眾個個義憤填膺，因正義無法伸張，此時，馬東石就出現，扮演「黃飛鴻」儆惡懲奸，將惡人賤人打到頭破血流變狗熊，大快人心。
其實呢條「橋」，荷里活不知用過多少次，我哋上世紀六十年代，由關德興飾演的黃飛鴻，也拍之不盡。
點解？因真實社會中，純靠法律的確未能剷除各種匪類，善良市民不時感到氣餒。
近日Netflix大Hit的《鐵拳教育》，套路百分百如此，不過場景改咗到中學之內，而負責鋤奸的，則是高大型仔金武烈。
集集對付流氓學生，劇本先將壞人所作所為，推到令人咬牙切齒地步，然後，金武烈呢位非常教師就出場打爆佢哋，劇情就咁簡單，食應大眾情緒又掂晒。