(曾智華)
報團稍後去台灣，交護照畀旅行社，對方一睇即話：「曾先生，你本護照就快過期，少過半年有效期，好多地方入唔到㗎！」
點搞？火速換領囉。如今非常方便，老婆大人上網撳幾撳，已經完成申請手續，唯一要交近照。
講起影近照，真真一肚氣。無論回鄉證好，身份證又好，影到自己個貓樣賊咁款，非常之唔順眼，但又冇符。
但護照好得多，自己影咗才交。邊度影？有嘞，旺角中旅社舊址樓下，應大把相舖喎，飛車去先。果然，中旅社搬咗，但大量證件相舖仍未搬，咁多間，競爭當然激烈，故此價錢非常合理（即係平）。
記得十年八年前影證件相，乜服務都冇，只叫你坐低，眼定定，咔嚓兩吓就完。
咁款，影出嚟的，當然效果不甚理想。有競爭有進步，如今又如何？
「先生，你先埋鏡位，可以化妝，也可以用Gel Set吓個頭，滿意才影啦。」
化妝品及髮膠滿枱任用，搞完坐低就位，移左移右之後，先試幾張。
今日科技，當然毋須底片，故此影幾多張都可。影呢類相，起初生生硬硬，都唔知點笑，幸而師傅好嘢，佢一日影N咁多個客人，協助客人擺位及教笑，非常專業。影呀影，終於大家都收貨。
離開照相店時，才發覺呢間店舖好多「免費模特兒」，包括演員、藝員⋯⋯（唔好亂作，人哋根本可能冇去過）吓，咁款，會否我都被擺上枱㗎？使唔使問佢收返廣告費呢？
老闆笑笑口：「曾先生，若效果理想，請介紹多啲人嚟影相啦！」
「冇問題，生意難做，幫到嘅，一定幫！」
免費宣傳：平通街，四十蚊，六張相包電子版，二十分鐘有得攞。坐低睇睇手機，已全部搞掂，果然「香港速度」！