曾智華
每屆政府去到最尾一年，全人類都開始八卦——哈，究竟特首會否連任呢？究竟財爺又有冇得冧莊呢？
越近換屆日子，越多人有興趣，上至政官商專業界，下至街市牛叔八嬸，都會問。最過癮，大家都會有自己意見。
近兩月的江湖飯局，已有N人拋出問題：「李家超會否連任呢？」
等我話你知，連佢自己都唔知！
就小弟的傳媒生涯見證，歷屆特首，包括董建華、曾蔭權、梁振英及林鄭月娥，全都唔知自己有冇得連任。不過，唔知還唔知，全人類一定繼續好奇，做記者的，有機會必會追問：「特首，你會否爭取連任呢？波叔，你會否做多一屆呢？」
此乃Model Question，一定要問。
有Model Question，當然有Model Answer，佢兩位當然唔會大大聲高調話：「我好想呀，一定會爭取呀！」若果呢度係美國，就會有人咁答。
老友，但呢度係香港，當然根據模範指示答：「我冇諗過呢個問題，目前，只集中做好分內工作！」（次次我聽見都想笑。）
佢倆也當然絕不會話：「我根本唔想再做，咪搞我，一於夠鐘就退休！」（可能真㗎！）
又或：「我係全港最稱職特首/財政司司長，故此，一定爭取留任！」
老友，答想走唔得，想連任都唔得，咁點睇到佢哋心意呢？易，請睇睇近日李特首及陳財爺，分別邀請全港傳媒訪問，講乜？正是講過去四年自己的政績！為乜突然咁高調講政績？即係話畀各方人士聽，呢四年，在我領導下，香港好掂呀。（是否不論！）
點解要大力宣揚「我好掂」，司馬昭之心啦。唯一我留意是政務司司長陳國基非常低調，呢個政治姿態你點睇？